អាវុធហត្ថរាជធានីភ្នំពេញ ឃាត់ខ្លួនស្រ្តី ០១នាក់ ដែលប្រើល្បិចបោកប្រាស់តាមប្រព័ន្ធ ហ្វេសបុក!

ក្រោយពេល ឃាត់ខ្លួនបាន ជនសង្ស័យ ខាងលើ បានសារភាពប្រាប់សមត្ថកិច្ចអាវុធហត្ថឲ្យដឹងថា រូបខ្លួនប្រើល្បិចបោកប្រាស់នេះ គឺតាមគំនិតសង្សាររបស់ខ្លួន ដែលជាជនជាតិនីហ្សេរីយ៉ា មានឈ្មោះ ស្លីម អាយុប្រហែល ២៨ឆ្នាំ ដែលស្គាល់គ្នាក្នុង បារខារ៉ាម៉ែល ដោយឲ្យរូបខ្លួនដើរតួជាបុគ្គលិក Phnom Penh AirPort ហើយបានឲ្យរូបខ្លួនទូរស័ព្ទប្រាប់ជនរងគ្រោះថា ឥវ៉ាន់ដែលផ្ញើរមកពីប្រទេស ឌូបៃ បានដល់ Phnom Penh AirPort ហើយ និងតំរូវឲ្យជនរងគ្រោះបង់ថ្លៃសេវាចំនួន ២០០ដុលា្ល អាមេរិក ដោយផ្ញើរលុយតាមរយៈ (វីង) លុះពេលបើកលុយបាន មួយសន្ទុះក្រោយមក ខ្លួនបានទូរស័ព្ទទៅជនរងគ្រោះម្តងទៀត និងឲ្យជនរងគ្រោះផ្ញើរលុយមកឲ្យខ្លួនចំនួន ៨០០ដុល្លា អាមេរិក បន្ថែមទៀត ដោយបា្រប់ជនរងគ្រោះថា ដើម្បីបង់ពន្ធ ព្រោះក្នុងឥវ៉ាន់មានប្រាក់ដុល្លាច្រើន តែជនរងគ្រោះប្រាប់ថា មិនទាន់មានលុយទេ ឮដូចនោះជនសង្ស័យខាងលើ បាននិយាយសំឡុតទៅជនរងគ្រោះ និងប្រាប់កុំឲ្យទូរស័ព្ទទៅរូបខ្លួនទៀត។ លុះរហូតដល់ថ្ងៃទី២៨ ខែតុលា ឆ្នាំ២០១៧ ជនរងគ្រោះបានហៅទូរស័ព្ទទៅជនសង្ស័យជាច្រើនលើក តែមិនលើកនិយាយ ទើបរហូតដល់ពេលល្ងាចបានជនសង្ស័យខាងលើលើកទូរស័ព្ទ ពេលនោះជនរងគ្រោះបានប្រាប់រូបខ្លួនថា បានផ្ញើរលុយឲ្យរូបខ្លួនចំនួន ៨០០ដុល្លា អាមេរិក តាមរយៈទ្រូម៉ានី ហើយរូបខ្លួនបានទៅបើកលុយនោះ នៅទ្រូម៉ានីក្នុងបូរីពិភពថ្មី ក្បែរផ្ទះរបស់ខ្លួន តែពេលទៅដល់ ក៏ត្រូវសមត្ថកិច្ចអាវុធហត្ថឃាត់រូបខ្លួនតែម្តង។

បច្ចុប្បន្ន ជនសង្ស័យ ខាងលើ ត្រូវបានសមត្ថកិច្ចជំនាញនៃការិយាល័យបង្ក្រាបបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ កំពុងកសាងសុំណុំរឿងបញ្ជូនទៅតុលាការ ដើម្បីចាត់ការតាមច្បាប់។