នៅរសៀលថ្ងៃទី១១ ខែកក្កដា ឆ្នាំ២០១៧ សមត្ថកិច្ចជំនាញនៃការិយាល័យបង្រ្កាបបទល្មើសព្រហ្មទណ្ឌអាវុធហត្ថរាជធានីភ្នំពេញ បានបញ្ជូនជនសង្ស័យ ០៤នាក់ ទៅតុលាការ ពាក់ព័ន្ធករណីប្លន់ និង ករណីឃាតកម្មគិតទុកជាមុន។ ជនសង្ស័យទាំង ០៤នាក់នោះមាន៖
១. ឈ្មោះ រិទ្ធ ធារ៉ា ភេទប្រុស អាយុ ៣១ឆ្នាំ ត្រូវបានកម្លាំងល្បាតមូលដ្ឋានខណ្ឌច្បារអំពៅឃាត់ខ្លួនបាន កាលពីរវេលាម៉ោង២០:១៥នាទី ថ្ងៃទី០៨ ខែកក្កដា ឆ្នាំ ២០១៧ នៅចំណុច ផ្លូវជាតិលេខ១ ភូមិតាព្រហ្ម សង្កាត់ព្រែកឯង ខណ្ឌច្បារអំពៅ រាជធានីភ្នំពេញ បន្ទាប់ពីរូបគេបានធ្វើសកម្មភាពគំរាមប្លន់ម៉ូតូ០១គ្រឿងម៉ាកស្មាស់រីវ៉ូ ពណ៏ខ្មៅ ស៊េរីឆ្នាំ២០១០ ស្លាកលេខភ្នំពេញ 1AU-8604 ពីជនរងគ្រោះឈ្មោះ ឃុន សុឆាយ ភេទប្រុស អាយុ ១៩ឆ្នាំ ស្របពេលដែលជនរងគ្រោះជិះម៉ូតូម្នាក់ឯង ភ្លាមៗនោះក៏ត្រូវបានកម្លាំងល្បាតអាវុធហត្ថខណ្ឌច្បារអំពៅធ្វើការបង្រ្កាប និង ឃាត់ខ្លួនបាន។
២. ឈ្មោះ រិន ចំរ៉ុង ភេទប្រុស អាយុ ២៣ឆ្នាំ ត្រូវបានកម្លាំងល្បាតអាវុធហត្ថខណ្ឌចំការមន ឃាត់ខ្លួនបានកាលពីវេលាម៉ោង ០១:០០នាទីរំលងអធ្រាត ថ្ងៃទី០៨ ខែកក្កដា ឆ្នាំ២០១៧ នៅចំណុចទល់មុខក្រសួងមហាផ្ទៃ ផ្លូវព្រះនរោត្ដម សង្កាត់ទន្លេបាសាក់ ខណ្ឌចំការមន រាជធានីភ្នំពេញ បន្ទាប់ពីរូបគេបានធ្វើសកម្មភាពគំរាមវាយប្លន់យកម៉ូតួ ០១គ្រឿងម៉ាក ធូដេ ពណ៏ស្ករ ស្លាកលេខភ្នំពេញ1DD-7498 ពីជនរងគ្រោះ ឈ្មោះ ម៉ូវ រតនា ភេទប្រុស អាយុ ១៦ឆ្នាំ ខណ:ពេលដែលជនរងគ្រោះ និង មិត្តភក្រ័ ០២នាក់ទៀតជិះជាមួយគ្នា។ ដោយក្រុមជនសង្ស័យមានគ្នា ០៣នាក់ ជិះម៉ូតូប្រដេញតាមជនរងគ្រោះ ធ្វើឲ្យជនរងគ្រោះមានការភ័យខ្លាចក៏ផ្ដួលម៉ូតូដើម្បីរត់គេចខ្លួនពីក្រុមចោរ ភ្លាមៗនោះកម្លាំងល្បាតមូលដ្ឋានអាវុធហត្ថខណ្ឌច្បារអំពៅ បានធ្វើអន្តរាគមន៏ប្រដេញតាមភ្លាមៗ រហូតឈានដល់ការឃាត់ខ្លួនបានជនសង្ស័យ ០១នាក់ ឈ្មោះ រិន ចំរ៉ុង ចំណែកបក្សពួក ០២នាក់ទៀត ដែលមាន ឈ្មោះ រ៉ា និង រ៉ូ សមត្ថកិច្ចអាវុធហត្ថកំពុងតាមចាប់ខ្លួនបន្ត។
៣.ឈ្មោះ ឡោះ អាលីមីន ហៅពយ ភេទប្រុស អាយុ ២០ឆ្នាំ , ៤.ឈ្មោះ ឡោះ កាសីរីន ហៅលីន ភេទប្រុស អាយុ ២៣ឆ្នាំ ត្រូវបានសមត្ថកិច្ចជំនាញនៃការិយាល័យបង្ក្រាបបទល្មើសព្រហ្មទណ្ឌ អាវុធហត្ថរាជធានីភ្នំពេញ សហការជាមួយកម្លាំងមូលដ្ឋានអាវុធហត្ថខណ្ឌជ្រោយចង្វារ និងចូលរួមពីកម្លាំងជំនាញអាវុធហត្ថខេត្តកណ្តាល បានស្រាវជ្រាវ និងវែកមុខសញ្ញា រហូតឈានដល់ការបង្ក្រាបនិង ឃាត់ខ្លួនបានជនជាប់ចោទទាំង ០២នាក់ខាងលើ កាលពីវេលាម៉ោង១៤:០០នាទី ថ្ងៃទី១០ ខែកក្កដា ឆ្នាំ២០១៧ នៅចំណុចភូមិឬស្សីជ្រោយ ឃុំឬស្សីជ្រោយ ស្រុកមុខកំពូល ខេត្តកណ្តាល តាមអំណាចដីការ របស់លោកឆៃ វីរៈ ចៅក្រមស៊ើបសួរ នៃសាលាដំបូងរាជធានីភ្នំពេញ។ គួរបញ្ជាក់ផងដែលថាជនជាប់ចោទទាំង ០២នាក់នេះបានប្រព្រឹត្តបទល្មើសឃាតកម្មគិតទុកជាមុន កាលពីវេលាម៉ោង០២:៣០នាទី រំលងអធ្រាត ថ្ងៃទី២៨ ខែវិច្ឆិកា ឆ្នាំ២០១៥ នៅចំណុចគល់ស្ពានលីយ៉ុងផាត់ ត្រើយខាងកើត សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
