កាលពីវេលាម៉ោង១៤:៤០នាទី ថ្ងៃទី០៩ ខែកញ្ញា ឆ្នាំ២០១៧ កម្លាំងល្បាតមូលដ្ឋានអាវុធហត្ថខណ្ឌទួលគោក បានបង្ក្រាប និងឃាត់ខ្លួនជនសង្ស័យ ០១នាក់ ឈ្មោះ ម៉េង យូ ភេទប្រុស អាយុ ១៧ឆ្នាំ ពាក់ព័ន្ធករណីគ្រឿងញៀន រួម និងដកហូតបានក្រាមពណ៍សថ្លា ០៣កញ្ចប់(ប្រភេទម៉ាទឹកកក) នៅចំណុចម្តុំរងចក្រឆ្នាំង សង្កាត់បឹងកកក់២ ខណ្ឌទួលគោក រាជធានីភ្នំពេញ។បន្ទាប់ពីធ្វើការបង្ក្រាបជនសង្ស័យ ខាងលើ បញ្ជូនមក ការិយាល័យជំនាញបង្ក្រាបបទល្មើសគ្រឿងញៀន បញ្ជាការដ្ឋានកងរាជអាវុធហត្ថរាជធានីភ្នំពេញ រួចមក កម្លាំងមូលដ្ឋានអាវុធហត្ថខណ្ឌទួលគោក បានបន្តល្បាត ដើម្បីការពារសន្តិសុខជូនបងប្អូនប្រជាពលរដ្ឋ ដែលរស់នៅក្នុងភូមិសាស្រ្តរាជធានីភ្នំពេញ លុះរហូតដល់ វេលាម៉ោង១៥:៤០នាទី ថ្ងៃដដែល នៅចំណុចប្លុកវីឡា៥៦ ផ្លូវ៥៩២ កែង៣១៣សង្កាត់បឹងកក់២ ខណ្ឌទួលគោក រាជធានីភ្នំពេញ ក៏ឃើញជនសង្ស័យ ០១ក្រុម កំពុងលេងល្បែងស៊ីសង(ចាក់ខ្លាខ្លោក) គួរឲ្យសង្ស័យ ភ្លាមនោះ កម្លាំងល្បាតអាវុធហត្ថខណ្ឌទួលគោក បានធ្វើការឃាត់ខ្លួនជនសង្ស័យបាន ០៤នាក់ ភ្លាមៗតែម្តង ហើយបានឆែកឆេរ ឃើញថ្នាំញៀន ១១កញ្ចប់(ប្រភេទម៉ាទឹកកក) លាក់ទុកនៅក្បែរនោះ។ ជនសង្ស័យទាំង ០៤នាក់ នោះមាន៖
១/ ឈ្មោះ ឈួ សុន ភេទប្រុស អាយុ ៥៦ឆ្នាំ
២/ ឈ្មោះ សុខ ណារ័ត្ន ភេទប្រុស អាយុ ២១ឆ្នាំ
៣/ ឈ្មោះ នូ សុខា ភេទប្រុស អាយុ ៤៩ឆ្នាំ
៤/ ឈ្មោះ ម៉ុង សុខហេង ភេទប្រុស អាយុ ៣៤ឆ្នាំ
បច្ចុប្បន្ន ជនសង្ស័យទាំង ០៥នាក់ ខាងលើ ត្រូវបានសមត្ថកិច្ចជំនាញនៃការិយាល័យបង្ក្រាបបទល្មើសគ្រឿងញៀន អាវុធហត្ថរាជធានីភ្នំពេញ កំពុងធ្វើការសួរចម្លើយ និងកសាងសុំណុំរឿងបញ្ជូនទៅតុលាការ ដើម្បីចាត់ការតាមច្បាប់
