នៅវេលាម៉ោង១០:២២នាទី ថ្ងៃទី៣១ ខែកក្កដា ឆ្នាំ២០១៧ កម្លាំងល្បាតមូលដ្ឋានអាវុធហត្ថខណ្ឌដូនពេញ បានបង្ក្រាប និងឃាត់ខ្លួនជនសង្ស័យ ០១នាក់ ដែលជាចោរលួចកាច់(ក)ម៉ូតូ។ ជនសង្ស័យ ឈ្មោះ ធុល មករា ភេទប្រុស អាយុ ៣០ឆ្នាំ ស្រុកកំណើតនៅខេត្តតាកែវ បច្ចុប្បន្ន ស្នាក់នៅផ្ទះជួល ភូមិក្វាកើត សង្កាត់ដង្កោ ខណ្ឌដង្កោ រាជធានីភ្នំពេញ។ បានធ្វើសកម្មភាពលួចកាច់ ក ម៉ូតូ ម៉ាក SUZUKI NEX ពណ៌ស ពាក់ស្លាកលេខ ភ្នំពេញ1GA-9921 របស់ជនរងគ្រោះ ឈ្មោះ ម៉ន សូថានី ភេទស្រី អាយុ ៤៩ឆ្នាំ នៅចំណុចមុខហាងមីនីម៉ាតស្មាយ ផ្លូវ១៨៤កែងផ្លូវលេខ៥១ សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ។ មុខធ្វើសកម្មភាព ជនសង្ស័យ ខាងលើ បានជិះម៉ូតូម៉ាក HONDA SCOOPY ពណ៌ស ពាក់ស្លាកលេខ 1CL- 6008 ជាម៉ូតូរបស់ខ្លួន ក្នុងគោលបំណង ដើរកាច់(ក)ម៉ូតូ លុះដល់ចំណុចកើតហេតុ ក៏ឃើញម៉ូតូ SUZUKI NEX ពណ៍ស ០១គ្រឿង ចតទុកពុំឃើញម្ចាស់ ដោយឃើញឱកាសល្អ រូបខ្លួនក៏បានយកម៉ូតូ របស់ខ្លួនទៅផ្ញើនៅមុខសាលាបារាំង(អាលីយ៉ង់) បន្ទាប់មករូបគេក៏បាន ធ្វើសកម្មភាពលួចកាច់(ក)យកម៉ូតូម៉ាក SUZUKI NEX ពណ៌ស នោះតែម្តង។ ក្រោយធ្វើសកម្មភាពលួចកាច់(ក)យកម៉ូតូបានសម្រេច ជនសង្ស័យបានជិះរត់គេចចេញយ៉ាងលឿន ភ្លាមនោះ ប្រជាពលរដ្ឋឃើញ ក៏ស្រែកឆោរឡោ ស្របពេលកម្លាំងអាវុធហត្ថខណ្ឌដូនពេញ កំពុងល្បាត ឃើញសកម្មភាពជនសង្ស័យខាងលើ កំពុងជិះម៉ូតូ ដែលលួចបាន រត់គេចខ្លួន ក៏ប្រដេញតាមភ្លាមៗ រហូតឈានដល់ការឃាត់ខ្លួនជនសង្ស័យខាងលើតែម្តង។
ក្រោយពេលឃាត់ខ្លួនបាន ជនសង្ស័យខាងលើ បានសារភាពប្រាប់សមត្ថកិច្ចអាវុធហត្ថឲ្យដឹងថា រូបគេធ្លាប់ធ្វើសកម្មភាព លួចកាច់(ក)ម៉ូតូម៉ាក SUZUKI NEX ពណ៌ស មិនចាំស្លាកលេខ ០១គ្រឿង បានសម្រេចម្តងរួចមកហើយ នៅចំណុចនឹងទីតាំងកើតហេតុខាងលើដដែល។
បច្ចុប្បន្ន ជនសង្ស័យ ខាងលើ ត្រូវបានសមត្ថកិច្ចជំនាញនៃការិយាល័យបង្ក្រាបបទល្មើសព្រហ្មទណ្ឌ អាវុធហត្ថរាជធានីភ្នំពេញ កំពុងកសាងសុំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់។
