កាលពីវេលាម៉ោង០៤:០០ទាបភ្លឺ ថ្ងៃទី០៩ ខែកក្កដា ឆ្នាំ២០១៧ មានករណីលួចកាច់ ក ម៉ូតូ ០១គ្រឿង ម៉ាកស្គុបពី ពណ៍ស ស្លាកលេខ ភ្នំពេញ1BE-5098 នៅចំណុចក្រោយមជ្ឈមណ្ឌលទួលគោក ផ្លូវ៣១៣ សង្កាត់បឹងកក់១ ខណ្ឌទួលគោក រាជធានីភ្នំពេញ របស់ជនរងគ្រោះឈ្មោះ តាន់ កែវសុបិន្ត ភេទប្រុស អាយុ ៥២ឆ្នាំ។ ក្រោយពេលជនរងគ្រោះ ដឹងថាម៉ូតូរបស់ខ្លូន ត្រូវបានចោរកាច់ក យកទៅបាត់ ទើបនៅវេលាម៉ោង១០:០០នាទីព្រឹកថ្ងៃដដែល រូបខ្លួនបានមកដាក់ពាក្យបណ្តឹងនៅមូលដ្ឋានអាវុធហត្ថខណ្ឌទួលគោក ក្រោយពេលទទួលបានពាក្យបណ្តឹងភ្លាម កម្លាំងអាវុធហត្ថខណ្ឌទួលគោក បានធ្វើការស្រាវជា្រវ រកមុខសញ្ញា យ៉ាងយកចិត្តទុកដាក់ រហូតដល់វេលាម៉ោង១២:០៥នាទីថ្ងៃដដែល ក៏ឃើញជនសង្ស័យ និងវត្ថុតាង នៅក្បែរវត្តអង្គតាមិញ ភ្លាមៗនោះ កម្លាំងអាវុធហត្ថខណ្ឌទួលគោក បានធ្វើអន្តរាគមន៍ប្រដេញតាមភ្លាមៗ រហូតដល់ចំណុចផ្លូវ១៨៦ ស្កាត់ទឹកល្អក់៣ ខណ្ឌទួលគោក ជនសង្ស័យ ក៏បានផ្តួលម៉ូតូចោល ហើយបានគេចខ្លួនបាត់។ អាវុធហត្ថខណ្ឌទួលគោក ក៏បានយកម៉ូតូដែលជនល្មើសរត់ចោល ប្រគល់ជូនម្ចាស់ដើមវិញ។
បន្ទាប់មក កម្លាំងអាវុធហត្ថបានបន្តយកចិត្តទុកដាក់ស្រាវជា្រវ តាមចាប់ជនល្មើស រហូតដល់វេលាម៉ោង១៥:៥០នាទី ថ្ងៃទី១១ ខែកក្កដា ឆ្នាំ២០១៧ កម្លាំងអាវុធហត្ថខណ្ឌទួលគោក បានស្រាវជ្រាវ រហូតឈានដល់ការឃាត់ខ្លួនជនសង្ស័យ ឈ្មោះ ស៊ុន សារីភេទប្រុស អាយុ២២ឆ្នាំ ដែលជាចោរកាច់ ក ម៉ូតូ បាននៅចំណុចផ្លូវដែក ម្តុំត្រឡោកបែក សង្កាត់ទឹកល្អក់១ ខណ្ឌទួលគោក រាជធានីភ្នំពេញ។
បច្ចុប្បន្ន ជនសង្ស័យខាងលើ ត្រូវបានការិយាល័យបង្ក្រាបបទល្មើសព្រហ្មទណ្ឌ អាវុធហត្ថរាជធានីភ្នំពេញ កំពុងសួរចម្លើយ និងកសាងសុំណុំរឿងបញ្ជូនទៅតុលាការ ដើម្បីផ្តន្ទាទោសតាមនិតិវិធីច្បាប់។
